من قيمة كام يوم كده
طلعت علينا جريدة الاخبار بصورة غريبة للدكتور نظيف رئيس الوزراء وهو فى جوله فى احد شوارع الاقصر ، وراكب عربية أوعى وشك.. المهم الدكتور أوقف مواطن شايل عشرة ترغفة من اللى الواحد بشلن ده ..ومن زجاج سيارته سأله
(( هاااااااااا يا عم المواطن ايه اخبار العيش)) .. قاله المواطن اللى كان لابس جلابيه (( لا تمام يا باشا العيش زى الفل)) ..واكيد المواطن ده رافع شعار ( لا اكذب ولكنى اتجمل ) أو يمكن كان حد ماسكله شومه من خلف الكاميرا أو المواطن نفسه تلاقيه معجب بسياسة (( ربي عيالك احسن)) .. وبعدين اساسا يعنى الدكتور نظيف رايح الاقصر علشان يسأل عن رغيف العيش .. بأه كل فران القاهرة اللى بطلع عيش مع نشارة الخشب مش عاجباه ورايح الاقصر يسأل مواطن عابر سبيل ..
طب نفترض مثلا ان رغيف العيش فى الاقصر زى الفل ..
يبأه خلاص العيش تمام ، وبعدين هو قضية رغيف العيش محتاجه سؤال ، ما الكل عارف رغيف العيش عامل ازاى .. طب ياخد عربيته كده ويروح اى فرن ويتنكر
زى( خالد زكى) ما عمل فى فيلم (طباخ الرئيس) ...ويقف فى طابور العيش ويشوف بعد 3 أو 4 ساعات كده العيش اللى خده ده شكله ايه .. ده لو اخد عيش أساسا إنما انا بتكلم عن افتراض ان وصل لشباك الفرن قبل ما يطلع صاحب الفرن ويعلق لافته
(( فنيتووووووووووو .. فوت علينا بكره )) .
هو ده رغيف العيش
طب لو مش مصدقنى .. انزل بكره كده اى فرن من بتوع العيش
ولو ربنا كرمك ونتعك بالسلامة وعرفت تشترى رغيف واحد بشلن
اطلع البلكونة بتاعتكم وارميه فى اى ركن وسيبه لمده يوم واحد ..بلاش يوم ..نص يوم .. وارجع شوف الرغيف حيبأه عامل إزاى ..
على الاقل حتكسب شاكوش وتوفر انك تشترى شاكوش بأد كده ..!
بعدين يا اخونا فى سؤال محيرني
هو اصلا رغيف العيش عملنا ليه أزمة فى البلد دي ..!
هو احنا حنخترع قنبلة ذرية بعد الشر
منستورده وخلاص ..
هى جت يعنى على العيش ..
ما احنا بنستورد علبة الكبريت من برة والاستيكة والقلم الرصاص ..
منستورد العيش وخلاص ونكبر دماغنا .
ممكن نستورد العيش من الصين أو من امريكا أو من أى حته ، وخلاص ..
وبكده نخلص نفسنا
وبلاها فرن وبلاها قمح وبلا بتاع
وكلام نعناع ..
الخميس يونيو 26, 2008 7:57 pm